電影節詳情、購票及活動報名－
⚡️第二屆「溝」電影節網頁
http://www.hkfcc.org/cultfilmfestival2018

「溝」前｜馮慶強

問：聽人講《午夜凶鈴》巧驚？！
答：驚㗎！我到依家都唔敢重睇。

問：雖然未睇過，不過我以前喺學校扮過貞子。頭髮梳前，遮住臉，窒下窒下咁郁。
答：可能太深入人心。當年戲院上，觀眾咿嘩鬼叫，開Party一樣。

問：其實點解揀呢套戲？
答：今次主題係錄影帶。貞子故事，同錄影帶直接有關，好貼題。

問：即係個故仔要講錄影帶？
答：咁又唔一定。除咗錄影帶本身，亦包括八十年代興起嘅MV熱、Video Art、OVA等等。

問：咩係OVA？
答：即Original Video Animation，一種以錄影帶形式發行嘅原創動畫片。由於直接銷售，繞過咗公共廣播審查，所以創作自由度好大。OVA題材可以嚴肅，又可以完全離經叛道，甚至有唔少作品，喺性與暴力方面，因為意識踩界，引起過爭議。

問：最近，經常有人回味八十年代。你哋係咪都想懷舊一下？
答：對我嚟講，八十年代未足夠叫舊。不過，同樣問題，我問過另一位節目策劃David。話曬年紀差一大截，我想知佢點睇。David Whatsapp覆『其實我做呢個programme，從來無特別懷舊過，或者諗存唔存在懷舊嘅問題。我從來無覺得VHS嘅年代好過宜家。比我揀我都會揀宜家，用一晚就可以搜羅到塔可夫斯基高清1080p全集嘅日子。做呢個programme我覺得比較有意思嘅係，以一個物質、載體作為切入點，打開一個特定年代嘅風貌。我地嘅選片第一眼望落去好似唔太集中，但我自己覺得其實都reflect咗八十年代中至九十年代流行文化以至政經環境嘅多種面向。呢個我係覺得有趣的』。

問：聽講，本來唔會有第二屆？
答：原本無話接住搞。齋放所謂溝片，我亦無咩興趣。直至搵到錄影帶呢個Point，有可能擴充到成為主題，我先至提出，嘗試再做。

問：今次多咗音樂呢部分，例如MV，點解？
答：首先，MV對視覺文化影響好大。比如米高積遜82年MV〈Thriller〉，從製作到演出，只可以用轟動嚟形容。又或者麥當娜嘅〈Material Girl〉，個MV就借用咗夢露嘅經典形象，重新包裝流行音樂，成為完美商品。經過六、七十年代思潮嘅衝擊同挫折，八十年代係另一番景象。83年《勁舞》（Flashdance）、84年《渾身是勁》（Footloose）、86年《壯志凌雲》（Top Gun）等，都加插咗歌曲，呢部分拍攝同剪輯方法，實際上係MV嗰一套。毫無疑問，MV雖然好睇，但係視覺藝術係咪一下子完全靠攏商業呢？其實又唔係，有唔少導演，發現錄影帶呢個媒介，可以好自主，好玩嘢，比如Derek Jarman，佢拍嘅MV同長片，形式、內容，都好激進！

問：等於麥當娜首〈Into the Groove〉，Sonic Youth成員嘅side project就翻玩過。呢個就係八十年代其中一個面貌。
答：要補充嘅係，原本「低清游擊戰」裏面，有兩部港產片。其中一部係黃志強導演嘅《舞廳》，另一部，就係未刪剪嘅《第一類型危險》。呢兩個戲，有好長時間因為種種問題而唔能夠再做正式放映，只能以影帶嘅形式喺坊間流傳；兩部電影本身同埋佢地嘅命運，都相當特別 。不過好可惜，因為成本、版權問題，最終都安排唔到放映。另外，主片單部分，中途亦要換片，但就一直決定唔到，呢個時候，David提議揀《德州風情畫》、《老翻大師》兩部戲。經佢一講，我認為成個節目，因為呢個建議，概念上的確完整好多。

問：放片除咗戲院，仲有茶餐廳、觀塘海濱？
答：若果配合到內容，換下放映場地，可能幾好玩。特別一提，石井岳龍套《半個人》，除左多年前香港國際電影節之外，應該再無喺香港正式公映過。而且今次放映嘅會係電影嘅足本版，因此暫時嚟講，呢場機會難逢。

問：話時話，你最想睇邊套？
答：可能係《布袋澳跳掣》。裏面記錄咗八十年代尾嘅香港，應該好有趣。

原文網址：http://timable.com/event/1728469